తెలంగాణ ఉద్యమ గీతం

ఉవ్వెత్తున ఎగిసింది ఉద్యమం మల్లి చూడు
విప్లవ చిరు జల్లుల్లు వీధి వీధిలల్ల జూడు ||ఉవ్వెత్తున||

రాజ్యాంగపు హక్కులుతో రాచరికం తిక్క కుదిరే
ప్రజాస్వామ్య గర్జనకు భూస్వాముల గుండెలదిరే
మ్రోగుతున్న డప్పులది ఆగదింక చప్పుడూ
వర్నకులాలకతీతంగా వర్ధమానమిప్పుడూ ||ఉవ్వెత్తున||

అమరవీరుల ఆత్మత్యాగం రక్తమై ఉడుకుతుంది
సత్యాగ్రాహమ్ము తోటి పల్లె నడుం బిగుస్తుంది
సాగుతున్న సమ్మెలతో పట్నం నిలబడ్డది
జిల్ల జిల్లల జనం నిద్రలేచి తిరగబడ్డది ||ఉవ్వెత్తున||

విద్యార్ధుల వీరాంగపు విద్ధ్యుత్తే ఇంధనమై
రైతన్నల కన్నీళ్ళే మండే అగ్గితునకలై
కార్మికుల కష్టాలే కదులుతున్న చక్రాలై
ఉరుకుతుంది బండి మనది ఆపేవాళ్లింక ఎవరు? ||ఉవ్వెత్తున||

తెలంగాణ నినాదాలు నింగిదాక వినబడాలే
తెలంగాణ జెండాలు జగమంత కనబడాలే
తెలంగాణ వచ్చే దాక చావుకైనా సిద్ధమ్మే
తెలంగాణ వచ్చే దాక చావుకైనా సిద్ధమ్మే ||ఉవ్వెత్తున||

-సిద్దార్థ పాములపర్తి